निषेधाज्ञा नलागेका यी दुई जिल्लामा कोरोना संक्रमणको अवस्था के छ ? – Thulo Khabar


२० जेठ, काठमाडौं । कोरोना संक्रमण नियन्त्रणका लागि निषेधाज्ञा लगाइएका जिल्लाको संख्या ७५ पुगेको छ । गृह मन्त्रालयको विवरण अनुसार खोटाङ र मनाङ बाहेक देशका सबै जिल्लामा निषेधाज्ञा जारी गरिएको छ ।

तीमध्ये ताप्लेजुङ, सप्तरी र मुस्ताङमा आंशिक निषेधाज्ञा लगाइएको छ ।

खोटाङमा भने जिल्ला प्रशासन कार्यालयले निषेधाज्ञाको आदेश जारी नगरे पनि स्थानीय तह, व्यापार संघ, यातायात व्यवसायी संघ लगायतले आफैं बजार, पसल र यातायात बन्द गर्ने गरेका छन् । उनीहरुले अत्यावश्यक बाहेक सम्पूर्ण सवारी साधन चलाउन बन्द गरेका छन् भने दैनिक उपभोग्य वस्तुका पसल बिहान ७ देखि ९ बजेसम्म खोल्ने गरेको खोटाङ सहायक प्रमुख जिल्ला अधिकारी विकल श्रेष्ठले जानकारी दिए ।

‘जिल्लामा संक्रमण दर पनि घट्दै गएको र स्थानीयवासी, व्यापार संघ, यातायात व्यवसायीहरुले स्वतःस्फूर्त रुपमा यातायात र बजार बन्द गर्ने गरेका कारण निषेधाज्ञा जारी गर्नुपर्ने अवस्था छैन,’ उनले भने ।

खोटाङ जिल्लाभर हाल ६३६ जना सक्रिय कोरोना संक्रमित रहेको र ५ जनाको मृत्यु भइसकेको श्रेष्ठले बताए ।

यस्तै हिमाली जिल्ला मनाङमा भने निषेधाज्ञा लगाउनुपर्ने आवश्यकता नै नदेखिएको जिल्ला प्रशासन कार्यालय मनाङले जनाएको छ । जनसंख्या कम भएकाले मानिसहरुको सम्पर्क पनि पातलो हुने भएकाले संक्रमण दर तीव्र रुपमा नबढेको सहायक प्रमुख जिल्ला अधिकारी शारदा चालिसेले बताइन् । यद्यपि स्वास्थ्य सुरक्षा मापदण्ड पालनामा भने कडाइ गरिरहेको उनको भनाइ छ ।

मनाङमा हाल १०२ जना सक्रिय संक्रमित रहेका छन् ।

window.fbAsyncInit = function () { FB.init({ appId: '280041239029772', xfbml: true, version: 'v2.7' }); }; (function (d, s, id) { var js, fjs = d.getElementsByTagName(s)[0]; if (d.getElementById(id)) { return; } js = d.createElement(s); js.id = id; js.src = "https://connect.facebook.net/en_US/sdk.js"; fjs.parentNode.insertBefore(js, fjs); }(document, 'script', 'facebook-jssdk'));
अनलाइनखबरबाट साभार

हाम्रो फेसबुक पेज